O repertorio de cancións galegas para voz e piano constitúe un rico patrimonio da cultura galega onde está o mellor da nosa música. Unha canción como "Negra sombra", con texto de Rosalía de Castro e música de Juan Montes é unha xoia músico-poética que define a Galicia musicalmente e que contribuíu sen dúbida á difusión da poesía de Rosalía.

Por tanto, non hai mellor día para un concerto destas características que une a mellor poesía galega coa música que o Día dás letras galegas, que rende homenaxe este ano a Carlos Casares (Ourense, 1941-Nigrán, 2002). Narrador, ensaísta, articulista e dinamizador cultural, autor de "Xoguetes para un tempo prohibido, "Vento Ferido" e "Vos mortos daquel verán", está considerado como unha das figuras máis singulares e renovadoras da literatura galega, sen esquecer a súa implicación na vida cultural, social e institucional, cun compromiso inequívoco coa lingua galega.

María Rodríguez é unha das sopranos españolas máis sobresalientes da súa xeración. Desde o seu debut, en 1992 na EXPO de Sevilla coa ANTOLOXÍA DA ZARZUELA de José Tamayo xunto a Plácido Domingo ata a actualidade trazou unha brillante carreira. Destacamos as súas interpretacións nas tempadas do Teatro da Zarzuela do Teatro Real e do Teatro Calderón de Madrid. As súas actuacións en escenarios como as Belas Artes de México, o Carnegie Hall de New York, Gran Teatro do Liceo de Barcelona, Maestranza de Sevilla, Palau da Música de Valencia, etc.

Traballou con directores da importancia de Odón Alonso, Rafael Frühbeck de Burgos, Enrique García Asensio, Jesús López Cobos, Víctor Pablo Pérez, Miguel Roa ou Antoni Ros Marbá; e con directores de escena como Gerardo Malla, José Carlos Plaza ou Emilio Sagi, entre outros.

Participou en estreas da importancia da ópera Divinas Palabras do Mestre Antón García Abril; cantou a NOVENA SINFONÍA de Beethoven co Orfeón Donostiarra; o STABAT MATER de Pergolesi en Spoleto (Italia) e o STABAT MATER de Rossini no Festival de Música Sacra de Marsella. Ofreceu recitais xunto ao pianista Alejandro Zabala. E cantou xunto ao tenor Aquiles Machado dentro do ciclo "Lírica en Barcelona" e ofreceu un gala-concerto xunto ao tenor José Carreras no Festival de L"Aquila (Italia).

Juan Durán, compositor, é autor de máis dun centenar de obras sinfónicas, de cámara e escénicas. Foi Premio da Cultura Galega en 2013 da Xunta de Galicia. Foi Socio fundador da Asociación Galega de Compositores. É Membro do Consello da Cultura Galega.

Foi laureado en concursos españois e internacionais e a súa música foi estreada por directores da talla de Antoni Ros-Marbá, Víctor Pablo Pérez, Juanjo Mena, Alejandro Posada, Óliver Díaz, etc. En novembro pasado estreábase no Auditorio Nacional a súa obra Cervantina baixo a dirección Víctor Pablo quen estreou varias obras del xunto ao Orfeón Donostiarra, a Sinfónica de Galicia ou a Sinfónica de Tenerife.

Para ver o programa completo do concerto, pica aquí.